ලකී දේවා වනාහි ආමූලකයෙකි. ඔහුගේ මෙකියන ‘රැඩිකල් භාවය’ මා හඳුනා ගත්තේ කුඩා අවධියේ ම ය. හැම විටම ලකී ට උවමනා වූයේ වෙනස් දෙයක් කිරීමට ය. සම්ප්‍රදායෙන් පිට පනිමින් වටඉඩ අතික්‍රමණය කිරීම (Out of the box) ඔහුගේ විලාසිතාවක් වූයේ ය. දහම් පාසල් දරුවකු ලෙසට ක්‍රිස්තියානි පල්ලියේ නාට්‍ය ඉදිරිපත් කළ ඔහුට, ඒ නිසාම පලා බෙදිණි.
ඒ කිසිවකින් ඔහු පසු බැස්සේද නැත. විවධ රටවල සන්දර්භයන්ට  අයත් කතා වස්තූන් සේ හැඟවෙන ‘පරිවර්තන යැ’ යි මාද රැවටුණු මේ ‘උලයානාගේ ආදරය’ සිංහල ලේඛකයකු විසින් ලියා ජනගත කරන ලද එවැනි පළමු වන කෙටි කතා සංග්‍රහය බව මම සිතමි. 
‘උල්යානාගේ ආදරය’ ලියා තිබෙන ලකී ගේ රචනා විලාසය කියවන්නට ආසා හිතෙන්නකි. නොයෙක් රටවල භාවිතා කෙරෙන නම් ගම් පමණක් නොව එහි තිබෙන වටපිටාව පිළිබඳ නොමඳ දැනගැනීමක් නොමැතිව මෙවැන්නක් එළිදැක්විය නොහේ.
පාඨකයා එම පසුබිම් වලට අවතීර්ණ කරන්න වූ විවිධ කතා වස්තූන් තුළින් නික්මෙන මානුෂීය සුගන්ධය තක්සේරු කළ හැකිද නොවේ. කියවන්නා අමන්දානන්දයට පත් කරවමින් දෘශ්‍ය රූපමාලාවක් මවා දෙන ඇතුල්‍යාසම ගෙයුමක් වන මේ කතා පෙළ ප්‍රාසංගික රුප පෙට්ටි නිර්මාණයන් ට කදිමය.
- ජ්‍යෙෂ්ඨ මාධ්‍යවේදී සිනමා විද්‍යාඥ - 'ගිවන්ත අර්ථසාද්'